Feb 4, 2013

                                   
                                   गीत 
                       मीठ भाषा भोजपुरी,
                       तबो राखें लोग दूरी,
             खोल अखियाँ बाबू एकबार देख लS।
            विदेशवन ले एके विस्तार देख लS।
            नाहीं मनब त,-2 हमार हुंकार देख लS!!

            संत कबीर गुरु गोरख बाबा भोजपुरी में लिखत रहले।
            ग्रियर्सन जी बहिरंग भाषा में एही के त गिनत रहले।
                        मारीशस फिजी सूरीनाम 
                        होखे भोजपुरीए में काम 
                        आरा भोजपुर के बानी 
                         बोले करोड़ों हिंदुस्तानी।
             देखल चाह त काम के आधार देख लS
            नाहीं मनब त,-2 हमार हुंकार देख लS!!

            व्याकरण पर कतहूँ कसि ल, भाषा के ना झूठलइब तू।
            संविधान में शामिल क ल, ना त बड़ा पछतइब तू।
                           तनी बोल आपन इच्छा 
                          चाहें कहीं ल परीक्षा 
                          भाषा भाव में विभोर 
                           हमके देख चारू ओर 
             नाहीं सुनब त अबकी आर-पार देख S
             नाहीं मनब त,-2 हमार हुंकार देख लS!!

             बटोहिया के वियोग में इहवा, मन छछनत देखल जाला।
             संस्कार में हर उत्सव के, सबकुछ अर्पत देखल जाला।
                            खाली चुप रही संसद 
                            त जमइहें पाँव अंगद। 
                            मत बुझ हो बेकार।
                            भाषा नीक बा हमार।
             खाली धमकी ना ह ललकार देख S
             नाहीं मनब त,-2 हमार हुंकार देख लS!!
                                   - केशव मोहन पाण्डेय 
                                                 (1.2.2013)

No comments:

Post a Comment